Deseñar a identidade corporativa dunha inmobiliaria implica enfrontarse a un desafío visual constante: como diferenciarse nun sector saturado onde case todas as marcas recorren ao tellado ou á silueta da casa? Para o lanzamento de Gestapi en Sanxenxo, o noso obxectivo foi fuxir desa literalidade e evitar os estereotipos habituais.

Para conseguir esa diferenciación, cambiamos o foco do obxecto estático (a casa) á acción (a entrada). Apostamos polo concepto da porta, entendendo que para Gestapi unha propiedade é o limiar cara a unha nova etapa vital. Baixo o lema «Abrimos as portas cara a algo novo», creamos unha narrativa que fala de oportunidades e benvida.

Esta idea conceptual materializouse nunha construción gráfica rigorosa. O isotipo fórmase a partir de dúas portas entrelazadas que, apoiadas nunha retícula de círculos, debuxan as iniciais da marca: a G de Gest e a A de API. Esta síntese acompáñase dunha paleta de cor sobria e elegante, que combina a confianza dos tons azuis (Azul horizonte e Azul medianoite) coa calidez orgánica do terracota. O resultado é unha identidade visual seria, equilibrada e con personalidade propia.